Ynglŷn â PISA
The Programme for International Student Assessment
Beth yw PISA?
Y Rhaglen Ryngwladol Asesu Myfyrwyr (PISA) yw astudiaeth addysg ryngwladol fwyaf y byd, ac mae'n cynnwys ysgolion a disgyblion mewn dros 90 o wledydd. Caiff PISA ei chynnal gan y Sefydliad ar gyfer Cydweithrediad a Datblygiad Economaidd (OECD) bob tair blynedd. Mae'r astudiaeth yn golygu y gellir gwerthuso systemau addysg ledled y byd drwy fesur gwybodaeth a sgiliau darllen, mathemateg a gwyddoniaeth disgyblion tua diwedd eu cyfnod mewn addysg orfodol. Drwy ddadansoddi sgorau disgyblion, ochr yn ochr â gwybodaeth gyd-destunol am nodweddion disgyblion a'u hymgysylltiad, prosesau rheoli ysgolion a pholisi cenedlaethol, mae'r astudiaeth yn cynnig cyfle i ddeall gwahaniaethau ym mherfformiad disgyblion, a hynny o fewn gwledydd sy'n cymryd rhan a rhyngddynt.
Gwyddoniaeth fydd ffocws cylch PISA 2025, a bydd cyfran fwy o'r cwestiynau yn targedu'r maes hwn.
Mae cymryd rhan yn PISA yn galluogi'r gwledydd sy’n cymryd rhan i gymharu eu cyflawniad yn rhyngwladol, dysgu o bolisïau ac arferion gwledydd eraill a monitro tueddiadau dros amser. Mae'r gweithgareddau hyn yn allweddol i wella cyrhaeddiad a phrofiadau addysgol.
Mae asesiad PISA yn cynnwys:
Asesiad ar sgrin i ddisgyblion
Mae hwn yn asesu cymhwysedd mewn gwyddoniaeth, darllen a mathemateg. Mae'r asesiad yn cynnwys dwy adran awr o hyd.
Holiadur cefndir i ddisgyblion
Yn holi am eu nodweddion, eu hysgol a'u profiadau dysgu.
Holiadur i ysgolion i'r penaethiaid
Yn holi am gyd-destun eu hysgol, y staff a'r disgyblion.
- Mawrth 2024 – Ysgolion a disgyblion yn cymryd rhan ym Mhrawf Maes PISA.
- Chwefror - Ebrill 2025 – Ysgolion a disgyblion yn Lloegr yn cymryd rhan ym Mhrif Astudiaeth PISA.
- Medi - Hydref 2025 – Ysgolion a disgyblion yng Nghymru a Gogledd Iwerddon yn cymryd rhan ym Mhrif Astudiaeth PISA.
- Rhagfyr 2026 – Canfyddiadau pob gwlad yn cael eu cyhoeddi mewn adroddiad rhyngwladol gan yr OECD. Caiff adroddiadau cenedlaethol eu llunio ar gyfer Cymru a Gogledd Iwerddon (gan UCL) ac ar gyfer Lloegr (gan OUCEA).
