Cymorth i Gydlynwyr Ysgol

Bydd Tîm Cymorth PIRLS yn gwneud cyswllt cychwynnol â'ch ysgol drwy lythyr ac e-bost croeso a anfonir at Bennaeth yr ysgol. Bydd yr ohebiaeth yn gofyn i chi gymryd rhan yn yr astudiaeth ac yn neilltuo dyddiad prawf PIRLS i'r ysgol. Dylech roi gwybod i'ch Uwch-dîm Arwain a'ch llywodraethwyr fod yr ysgol wedi cael ei dewis. Bydd aelod o Dîm Cymorth PIRLS yn ffonio'r ysgol i drafod yr astudiaeth ac ateb unrhyw gwestiynau sydd gennych.

I gofrestru ar gyfer yr astudiaeth, cwblhewch y Ffurflen Gofrestru ar-lein ar gyfer Prif Astudiaeth PIRLS y ceir dolen iddi yn eich e-bost croeso, gan gadarnhau'r manylion allweddol, gan gynnwys gwybodaeth gyswllt yr ysgol a pha mor addas yw'r dyddiad a gynigiwyd ar gyfer y prawf yn y llythyr croeso. Os nad yw'r dyddiad yn addas, dylech awgrymu dyddiadau eraill yn ystod cyfnod y profion pan fyddwch yn llenwi'r Ffurflen Gofrestru. Yna bydd Tîm Cymorth PIRLS yn cadarnhau'r dyddiad amgen ar gyfer eich prawf.

Yn dibynnu ar faint eich ysgol, cyfanswm nifer y disgyblion Blwyddyn 5 sy'n mynychu'r ysgol a maint eich dosbarthiadau, caiff un dosbarth Blwyddyn 5 neu fwy ei ddewis i gymryd rhan yn PIRLS. Bydd yr ysgol yn cael Rhestr Dosbarthiadau i'w llenwi â'r wybodaeth hon a bydd Tîm Cymorth PIRLS yn rhoi gwybod drwy e-bost pa ddosbarth(iadau) a ddewiswyd.

Unwaith y bydd y dosbarthiadau Blwyddyn 5 fydd yn cymryd rhan wedi cael eu dewis, byddwn yn gofyn i chi ddarparu rhestr o enwau a manylion y disgyblion yn y dosbarthiadau a ddewiswyd. Anfonir dogfen at Gydlynydd yr Ysgol i'w llenwi â'r data perthnasol. Rhestr Disgyblion yw'r enw ar y ddogfen hon. Byddwn hefyd yn gofyn i Gydlynydd yr Ysgol weithio gyda Chydlynydd Anghenion Addysgol Arbennig yr Ysgol i ddarparu unrhyw wybodaeth berthnasol am Anghenion Addysgol Arbennig. Dylid cyflwyno dogfen y Rhestr Disgyblion i Dîm Cymorth PIRLS drwy ddull diogel. Bydd y tîm wedyn yn cadarnhau'r rhestr derfynol o ddisgyblion a fydd yn cwblhau asesiad PIRLS ar ddyddiad y prawf.

Gofynnwn i'r ysgol gynnal rhai gwiriadau TG syml cyn dyddiad y prawf er mwyn sicrhau y gall asesiad PIRLS fynd rhagddo mewn ffordd mor ddidrafferth â phosibl. Bydd Cydlynydd yr Ysgol yn cael cyfarwyddiadau drwy e-bost ar gyfer ymgymryd â'r canlynol:

1. Adnodd Diagnostig i Wirio Parodrwydd yr Ysgol, a
2. Adnodd Gwirio'r Platfform Asesu, gyda manylion mewngofnodi i'w defnyddio er mwyn sicrhau y gall y disgyblion gael mynediad i blatfform y prawf.

Bydd Tîm Cymorth PIRLS yn darparu templed ar gyfer llythyr i Gydlynydd yr Ysgol er mwyn hysbysu rhieni/gwarcheidwaid y disgyblion a gaiff eu dewis am astudiaeth PIRLS ac i roi gwybodaeth berthnasol am ddiogelu data. Gellir rhannu'r llythyr drwy e-bost neu fel copi argraffedig. Ar ôl cyfnod a bennir i rieni/gwarcheidwaid ymateb, rhowch wybod i Dîm Cymorth PIRLS am unrhyw rieni/gwarcheidwaid sy'n gwneud cais i'w plentyn beidio â chymryd rhan a chyfanswm terfynol y disgyblion fydd yn cymryd rhan.

Un o ddibenion pwysig PIRLS yw deall ffactorau sy'n ymwneud â'r gymuned, yr ysgol a'r disgyblion sy'n dylanwadu ar gyflawniad darllen.

Gofynnir i aelod o Dîm Arwain yr Ysgol neu'r Pennaeth gwblhau Holiadur i Ysgolion fel rhan o astudiaeth PIRLS er mwyn darparu gwybodaeth am gyd-destun yr ysgol. Caiff cyfarwyddiadau a manylion mewngofnodi eu darparu drwy e-bost, i'w dosbarthu i'r person perthnasol.

Hefyd, gofynnir i athro/athrawon Blwyddyn 5 y dosbarthiadau a gaiff eu hasesu gwblhau Holiadur i Athrawon. Mae'r holiadur yn gofyn am addysg yr athro, ei ddatblygiad proffesiynol a'i brofiad addysgu. Mae hefyd yn holi am addysgeg, parodrwydd disgyblion i dderbyn cyfarwyddyd ac arferion asesu ar gyfer darllen.

O leiaf bythefnos cyn dyddiad y prawf, bydd Tîm Cymorth PIRLS yn cadarnhau enw a chyfeiriad e-bost unrhyw Weinyddwr/Weinyddwyr Prawf a fydd yn ymweld â'r ysgol ar ddyddiad prawf PIRLS er mwyn helpu i'w gynnal. Gweinyddwr y Prawf fydd y person cyswllt i Gydlynydd yr Ysgol drafod y trefniadau ar gyfer diwrnod y prawf, logisteg a phrotocolau diogelu perthnasol ymlaen llaw. Unwaith y caiff y manylion eu cadarnhau'n derfynol, dylid atgoffa'r disgyblion sy'n cymryd rhan a'u hathrawon o leoliad yr asesiad a'r amser dechrau.

Caiff deunyddiau asesu PIRLS eu hanfon drwy'r post er mwyn i Gydlynydd yr Ysgol gadarnhau bod popeth wedi'i gynnwys ac yn gywir a dylai storio'r deunyddiau mewn man diogel i'w defnyddio ar ddiwrnod y prawf.

Dylai'r broses o gynnal yr asesiad a'r holiadur i ddisgyblion ddilyn yr amserlen gynlluniedig a dylai pob disgybl gael ei dystysgrif ar ôl cwblhau'r broses.

Dylai unrhyw ddogfennaeth bwysig a gaiff ei defnyddio i gynnal diwrnod y prawf gael ei llun-gopïo a dylid rhoi'r copi gwreiddiol i Weinyddwr y Prawf.

Trefn diwrnod yr asesiad:

• Trefnu'r ystafell, manylion mewngofnodi disgyblion a chyfarwyddiadau cyffredinol
• Adran 1 yr asesiad: 40 munud yn union
• Egwyl fer
• Adran 2 yr asesiad: 40 munud yn union
• Egwyl fer
• Holiadur i Ddisgyblion: tua 30 munud
• Casglu deunyddiau, dod â'r sesiwn i ben ac ailosod yr ystafell

Bydd Tîm Cymorth PIRLS yn anfon Ffurflen Honorariwm ar-lein yn gofyn i'r Rheolwr Cyllid ddarparu manylion banc yr ysgol er mwyn hawlio tâl gweinyddu'r ysgol fel diolch am gymryd rhan. Caiff Arolwg i Gydlynwyr Ysgol ei rannu hefyd er mwyn cynnig cyfle iddynt roi adborth ar eu profiad o PIRLS.