I rieni a gofalwyr
Beth yw TIMSS?
Mae'r Astudiaeth o Dueddiadau mewn Mathemateg a Gwyddoniaeth, sef "TIMSS", yn astudiaeth ryngwladol fawr sy'n cael ei chynnal bob pedair blynedd. Mae'n mesur pa mor dda mae disgyblion ledled y byd yn perfformio mewn mathemateg a gwyddoniaeth. Yng Nghymru, mae disgyblion ym Mlwyddyn 5 (tua 10 oed) yn cymryd rhan.
Mae dros 60 o wledydd yn cymryd rhan yn TIMSS. Drwy gymryd rhan, mae eich plentyn yn helpu i ddarparu gwybodaeth bwysig a all wella addysg yng Nghymru, y DU, a gwledydd eraill.
Beth yw Prawf Maes TIMSS?
Caiff astudiaeth TIMSS ei chynnal mewn dwy ran: prawf maes a phrif astudiaeth. Caiff ysgolion gwahanol eu dewis ar gyfer pob rhan. Caiff y prawf maes ei gynnal ym mis Mawrth 2026 ac mae'n cynnwys sampl lai o ysgolion a disgyblion na'r brif astudiaeth yn 2027.
Mae'r prawf maes yn bwysig iawn gan ei fod yn helpu i sicrhau bod yr holl brofion, holiaduron a phrosesau yn gweithio'n iawn cyn y brif astudiaeth. Mae cyfranogiad eich plentyn yn y prawf maes yn werthfawr iawn ac yn helpu i wella'r astudiaeth i bawb.
Beth sy'n digwydd fel rhan o TIMSS?
I'ch plentyn, mae cymryd rhan yn TIMSS yn golygu:
- Cwblhau asesiad ar-lein rhyngweithiol mewn mathemateg a gwyddoniaeth.
- Llenwi holiadur byr am fywyd, ysgol a phrofiadau dysgu eich plentyn.
Nid oes angen i'ch plentyn baratoi nac adolygu cyn yr asesiad.
I chi neu'ch cymar/partner:
- Gofynnir i chi gwblhau holiadur ar-lein byr am eich teulu, amgylchedd dysgu eich plentyn, a rhywfaint o wybodaeth gefndir.
Beth yw manteision TIMSS?
Mae sawl mantais yn gysylltiedig â chymryd rhan yn TIMSS, i'ch plentyn ac i addysg yng Nghymru.
- Bydd eich plentyn yn ein helpu i ddysgu mwy am ba mor dda mae ein system addysg yn gweithio.
- Bydd eich plentyn yn cynrychioli Cymru mewn astudiaeth ryngwladol bwysig ac yn cael tystysgrif am wneud hynny.
- Bydd eich plentyn yn ymarfer sgiliau ar gyfer sefyll profion mewn ffordd hamddenol heb lawer o bwysau.
- Bydd eich plentyn yn cael y cyfle i ymarfer ei sgiliau mathemateg a gwyddoniaeth drwy asesiad ar-lein diddorol ac arloesol.
Cymorth TIMSS
Rydym yma i gefnogi ysgolion a disgyblion pan fyddant yn cymryd rhan yn TIMSS.
Os bydd gennych unrhyw gwestiynau, cysylltwch â ni rhwng 8am a 4pm o ddydd Llun i ddydd Gwener ar 0207 010 2023 neu drwy e-bostio TIMSSCymru@pearson.com unrhyw bryd.
